SIE: Meiiii! Am Söder sei Hund is gschtorm.
ER: Ah, so a Scheiß!
SIE: Ja, jetzt isser traurig, hat er auf Facebook gschriebn.
ER: So a hundsverreckter Scheiß!
SIE: Also bittschön, a bisserl Mitgefühl derf scho sei...
ER: Drecksglump!
SIE: Sag amoi, herst du mir überhaupts zu?
ER: Der Söder hat an Hund…
SIE: ...ghabt.
ER: Zefix!
SIE: Oiso, i weiß ja net, was du immer gegen den Söder redst. So schlimm kanner ja ned sei, wenn er an Hund hat.
ER: ...ghabt hat.
SIE: Er hat no oan.
ER: Und?
SIE: Der lebt no. Oiso, wer zwoa Hund hat...
ER: ...ghabt hat.
SIE: Jetzt lenk net immer ab. Oiso, Leit mit zwoa Hund, die ham doch gewieß a... Ding... a Empa-thie.
ER: Für wos?
SIE: Für de ... Ding... de Kreatur, für die Natur, für die Umwelt...
ER: Fang du a no o! Der Mann is a verkappter Greaner!
SIE: Weil er zwoa Hund hat?
Er: Oan.
SIE: Was machstn du da überhaupts?
ER: Die gschissne Plastikverpackung, die gschissne. I kriag de Wurscht net auf!
SIE: Des will er ja a ändern.
ER: Wer? Wos?
SIE: Der Söder is ja jetzt a geng des Plastik.
ER: Endlich mal was Vernünftigs! Da brauchst ja a Werkzeig, dass dei Wurscht aufkriegst!
SIE: Aber in wos sollns denn dann de Bierkugel neitua?
ER: Frag doch dein Söder, der is doch so innovativ!
SIE: Mei, vielleicht kunnt ma was biologisches nemma, und regional wär ja a net schlecht.
ER: Wadlstrümpf.
SIE: Wos?
ER: Wadlstrümpf wärn net schlecht. Aus Schafswoll. Des is abbaubar, regional und „hält die Wert-schöpfung bei uns.“
SIE: A Bierkugel im Wadlstrumpf. Hm. Mei, warum net?
ER: Und wenn da Söder sei Bierkugl gessn hot, kann er den Wadlstrumpf no für was anders hernemma.
SIE: Zum oziang?
ER: Na. Die Scheiße von seim Hund aufklaubn.